Таразда алты анаға "Алтын алқа", 29 анаға "Күміс алқа" тапсырылды

Бүгін, 18 желтоқсанда Тараз қаласының әкімі Бақытжан Орынбековтің қатысуымен "Алтын алқа" және "Күміс алқа" иегерлеріне алқаларды табыстау рәсімі ұйымдастырылды. Басқосуда шаһар басшысы алтын құрсақты аналарға ізгі тілегін жеткізді, деп хабарлайды Zakon.kz.

"Өздеріңіз білесіздер, егемендік жылдары демографиялық саясатқа ерекше назар аударылды. Соның арқасында халық саны бүгінде жиырма миллионнан асып, үлкен демографиялық көрсеткішке қол жеткізіп келеміз. Көне шаһар – Тараз қаласының тұрғындарының да саны артып, бүгінгі күні 430 мыңға жетті. Сонымен қатар, елімізде ана мен баланы қорғау мақсатында да көптеген ілкімді істер қолға алынып, жарқын жобалар жемісін беруде. Мұның барлығы біздің елімізде әйел азаматының орны биік екенін айғақтайды. Елімізде де көпбалалы аналарға қолдау қашанда аз болған емес. Бүгінгі сіздермен жүздесуіміз де соның бір айқын көрінісі", – деген Бақытжан Әмірбекұлы алты анаға "Алтын алқа", 29 анаға "Күміс алқа" тапсырды.

Сурет: Тараз қаласы әкімдігінің баспасөз қызметі

Марапат иелері де өз кезегінде қала басшылығына шынайы ризашылықтарын жеткізіп, ізгі тілектер білдірді.

Сурет: Тараз қаласы әкімдігінің баспасөз қызметі

 Жалпы, Тараз қаласы бойынша 2010-2023 жылдар аралығында 2 753 аналарға "Алтын алқа", 2 516 анаға "Күміс алқа" табысталған.

Сурет: Тараз қаласы әкімдігінің баспасөз қызметі