Қауіпті ойыншықтар анықталды: Жаңа жыл алдында ДСМ ел азаматтарына ескерту жасады

Денсаулық сақтау министрлігі Санитарлық-эпидемиологиялық бақылау комитеті ел азаматтарына базардағы балаларға арналған ойыншықтар арасында денсаулыққа қауіптілері анықталып жатқанын айтып, ескерту жасады, деп хабарлайды Zakon.kz.

Өнімнің қауіпсіздігіне мониторинг жүргізу шеңберінде ҚР ДСМ Санитариялық-эпидемиологиялық бақылау комитеті Кеден одағының "Ойыншықтардың қауіпсіздігі туралы" техникалық регламентінің міндетті талаптарына сәйкес келмейтін балалар ойыншықтарын анықтады.

"Бұзушылықтардың басым бөлігі таңбалау талаптарының бұзылуына байланысты - 99,3%, органолептикалық көрсеткіштер бойынша бұзушылықтар - 0,7%. Бұл ретте ойыншықтардың 97%-ы Қытайдан, 3%-ы ЕАЭО елдерінен әкелінген". ҚР ДСМ Санитарлық-эпидемиологиялық бақылау комитеті

Комитет азаматтарды ойыншықтарды сатып алу кезінде мұқият болуға шақырады. Әрі мынандай кеңес береді:

• Ойыншықтарда талаптарға сәйкес бұйым туралы толық ақпарат: елдің, өндірушісінің атауы, ойыншық арналған баланың ең төменгі жасы немесе баланың жасын, жасалған күнін, негізгі конструкциялық материалын көрсететін пиктограмма болуы тиіс.
• Ойыншық туралы барлық ақпарат мемлекеттік және орыс тілдерінде берілуі тиіс.
• Ойыншықты таңдаған кезде бояуының тұрақтылығын тексеріңіз, шеттері сынған, жиектері өткір болмауы тиіс, жұмсақ ойыншықтың матасы тығыз болуы және түгі түспеуі тиіс.
• Ойыншықтың өткір, жағымсыз, бөгде иісі болмауы тиіс, 3 жасқа дейінгі балаларға ұсақ бөлшектері бар ойыншықтарды алмаңыз.
• Сатып алудан бұрын тауардың қауіпсіздігін растайтын сәйкестік сертификатын талап етіңіз. Ойыншықтарды күмәнді жерлерден сатып алмаңыз және таңбалауына назар аударыңыз.