Жамбыл облысында полицей Антикор қызметкерлеріне қарсылық көрсеткен

2024 жылғы 25 желтоқсанда Сыбайлас жемқорлыққа қарсы іс-қимыл агенттігінің ресми өкілі Данияр Биғайдаров агенттікте өткен брифингіде Жамбыл облысында шекаралық полиция бөлімдерінің бірінің қызметкерлерімен қылмыстық әрекеттердің жолын кесу туралы хабарлады, деп хабарлайды Zakon.kz.

Данияр Биғайдаровтың айтуынша, тәртіп сақшылары жанар-жағармайдың Қазақстаннан заңсыз шығаруылуына қамқорлық жасап, шетелдіктерден материалдық сыйақы алды деген күдікке ілінді.

"Өздерінің заңсыз әрекеттерінің салдарынан көрші мемлекеттің азаматтары мұнай өнімдерін тасымалдауды ұйымдастырған", - деді Биғайдаров.

Жедел-іздестіру шаралары барысында күдіктілердің бірі Сыбайлас жемқорлыққа қарсы қызмет қызметкерлеріне қарсылық көрсеткен. Ер адам қызметтік қаруын қолданған. Сот санкциясымен ол қамауға алынды.