Ақтау маңындағы ұшақ апатынан зардап шеккен 29 шетел азаматы Отанына аман-есен жетті

ҚР Денсаулық сақтау министрлігі 31 желтоқсанда Ақтау маңында болған ұшақ апатынан зардап шеккен 29 адамның барлығы медициналық қызметпен тұрғылықты елдеріне жеткізілгенін хабарлады, деп хабарлайды Zakon.kz.

Ведомствоның хабарлауынша, Ақтау маңындағы ұшақ апатынан зардап шеккен, Маңғыстау облыстық ауруханасының реанимация бөлімшесінде 6 күн бойы емделіп жатқан Әзербайжанның қалған үш азаматы Әзербайжанға арнайы бортпен жеткізілді. 

"Бір пациент механикалық желдетуден, вазопрессордан және дәрілік седациядан ажыратылған. Басқа екі зардап шеккен адамда вазопрессордың дозасы ең төменгі дозаларға дейін төмендетілді", - делінген хабарламада.

Қайғылы оқиғадан кейін дәрігерлердің білікті іс-қимылының арқасында келіп түскен барлық пациенттердің жағдайының динамикасы тұрақтандырылды, нашарлау байқалмады.

Бүгінгі таңда Ақтау маңындағы ұшақ апатынан зардап шеккен 29 адамның барлығы медициналық қызметтердің күшімен тұрғылықты елдеріне тасымалданды.