Мемлекет басшысы уақыт белдеуіне қатысты пікір білдірді

Мемлекет басшысы Қасым-Жомарт Тоқаев қоғамдағы бірыңғай уақыт белдеуі туралы айтылып жүрген пікірлерге қатысты жауап берді, деп хабарлайды Zakon.kz.

Тоқаев жағдайды көріп-біліп отырғанын айтты.

"Үкімет өз шешімінің орынды екеніне сенімді және Қазақстан бір уақыт белдеуінде болуы қажет деп санайды. Уақытты дұрыс пайдалану туралы Барселона декларациясында әртүрлі уақыт белдеуін енгізуге, оны қысқы және жазғы уақытқа ауыстыруға әуес болмау қажеттігі айтылған. Дегенмен азаматтарымыз өтініш білдіріп жатыр. Үкіметтің шешіміне қатысты ашық талқылаулар жандана түсті". Қасым-Жомарт Тоқаев

Президенттің айтуына қарағанда, қоғамда көзқарас қайшылығын тудыратын мұндай мәселелерді мұқият талқылау қажет.

"Сондықтан Парламентте ғалымдардың, сарапшылардың және аймақ өкілдерінің қатысуымен қоғамдық тыңдау өтті. Тараптар уақыт белдеуін ауыстырудың ел экономикасына және азаматтардың тұрмысына әсері жөніндегі барлық пікірді ескере отырып, 1 наурызға дейін жан-жақты зерттеу жүргізуге уағдаласты. Содан кейін нақты ұсыныстар әзірленеді", - деді ол.

Мемлекет басшысы Парламент пен Үкімет бұл мәселені байыппен зерделеп, ортақ әрі дұрыс шешімге келетініне сенім білдірді.