Тоқаев "Қазақстан "штрафстанға" айналды" дейтін мәлімдемеге қатысты пікір білдірді

Президент Қасым-Жомарт Тоқаев 2025 жылғы 28 қаңтардағы үкіметтің кеңейтілген отырысында Қазақстанға неше түрлі лақап ат қойып жүргендерді сынады, деп хабарлайды Zakon.kz.

"Мәжбүрлеу шаралары болмаса, тәртіп орнату мүмкін емес екенін әлемдік тәжірибе көрсетіп отыр. Сондықтан мемлекеттің іс-әрекеттеріне түсіністікпен қараған жөн. Бұл орайда диалог арқылы қоғамдық келісімге келу керек. Қалай десек те, мемлекет заң тәртібін қамтамасыз ету үшін қабылдайтын шаралар өз елін күстәналауға себеп болмауға тиіс", - деді ол.

Тоқаевтың пікірінше, кейбір азаматтар елімізді мазақ қылуға әуестеніп барады.

"Мысалы, өзге елдердің өкілдері жоқ жерден "керемет жетістіктерді, табыстарды" тауып алып, оны шетелге жан-жақты насихаттап жатады. Ал біздің азаматтар, олардың ішінде шоу-бизнес өкілдері, өзін өзі "қоғам белсендісі" санайтын жастар, тіпті, депутаттар да бар, Қазақстанға неше түрлі лақап ат қоятын болды. Бұл енді мүлдем түсініксіз, ақылға сыймайтын нәрсе", - деді Президент.