СҚО-да мектеп оқушысы туберкулез жұқтырды: онымен байланыста болған мыңнан астам адам есепке алынды

Солтүстік Қазақстан облысы Ғабит Мүсірепов атындағы аудандағы Новоишим орта мектебінің алтыншы сынып оқушысынан ашық түрдегі туберкулез анықталды, деп хабарлайды Zakon.kz.

Қазір науқаспен байланыста болған мыңнан астам адам есепке алынған. Дәрігерлердің айтуынша, оқушы үш жыл бұрын да туберкулезбен ауырған, бірақ толық ем қабылдамаған. Қазір ол облыстық фтизиопульмонологиялық орталықта емделіп жатыр. Алтыншы сынып оқушысының жағдайы тұрақты, деп хабарлады "Жетінші арна".

Белгілі болғандай, өңірде жыл басынан бері оқушылар арасында туберкулездің екі жағдайы тіркелген.

Білім басқармасының басшысы Айнагүл Сұрағанованың айтуынша, жұқпалы ауру туралы белгілі болған сәтте мектеп әкімшілігі жалпы мектепішілік ата-аналар жиналысын өткізген.