Сыртқы істер министрлігі 70 шақты қазақстандықтың Ираннан шығуына көмектесті

2025 жылғы 16 маусымда өткен брифингте ҚР Сыртқы істер министрлігінің ресми өкілі Айбек Смадияров Ираннан шығу кезінде қазақстандықтардың ішінде кімдерге көмек қажет болғанын айтты, деп хабарлайды Zakon.kz тілшісі.

Смадияровтың айтуынша, соңғы күндері Ираннан біршама Қазақстан азаматына елден шығуға көмек көрсетілген.

"Атап айтқанда, 14 маусым күні Иранда қызметтік іссапарда болған алты Қазақстан азаматының Әзербайжан арқылы елге оралуына көмек көрсетілді. Ал 15 маусымда Қазақстаннан іссапармен барған азаматтарды, оның ішінде дипломаттардың отбасы мүшелерін, Экономикалық ынтымақтастық ұйымының Хатшылығында жұмыс істейтін қызметкерлерді және басқа да іссапармен жүрген азаматтарды қосқанда, 68 Қазақстан азаматының Ираннан Түрікменстанға шығуы ұйымдастырылды. Барлық отандастарымыз жақын күндері елге оралады деп үміттенеміз", – деді министрліктің ресми өкілі.

Ол сондай-ақ Қазақстанның Ирандағы шетелдік мекемесінің қызметкерлері қалыпты режимде жұмысын жалғастырып жатқанын атап өтті.

Бұған дейін Смадияров Израиль мен Ирандағы қазақстандықтардың санын айтты.