Түркістан облысында қоқыс контейнерінен жаңа туған сәбидің мәйіті табылды

Түркістан облысы Кентау қаласындағы аулалардың бірінде жаңа туған нәрестенің мәйіті табылды, деп хабарлайды Zakon.kz.

Облыстық полиция департаменті қазір баланың анасын анықтау үшін жедел-іздестіру шаралары жүргізіліп жатқанын мәлімдеді.

Полиция жариялаған фотодан сәбидің денесі қоқыс жәшігі маңынан табылғанын байқауға болады.

"Полиция қызметкерлері аулааралық аумақтарды аралап, бейнебақылау камераларының жазбаларын зерделеп, сондай-ақ жақын орналасқан үйлердің тұрғындарымен және куәгерлермен сұхбат жүргізіп жатыр". Түркістан облысы полиция департаменті

Ведомствоның мәліметінше, медициналық мекемелер де кешенді түрде тексеріліп жатыр.

Барлық мән-жайды анықтау мақсатында қажетті тергеу әрекеттері жүргізіліп, тергеу нәтижесі бойынша заңға сәйкес тиісті шешім қабылданады.

"ҚР Қылмыстық-процестік кодексінің 201-бабына сәйкес, тергеу мүддесі үшін өзге ақпарат жария етілмейді", - деп хабарлады Түркістан облысы ПД.