S&P Қазақстанның рейтингін 10 жылда алғаш рет көтерді
Сурет: Zakon.kz
Халықаралық S&P Global Ratings рейтинг агенттігі Қазақстан Республикасының тәуелсіз кредиттік рейтингін "BBB" деңгейіне дейін көтерді. ҚР Ұлттық экономика министрлігінің мәліметінше, агенттік шкаласы бойынша бұл рейтинг деңгейіне Қазақстан алғаш рет 2016 жылдан бері жетіп отыр.
"Тәуелсіз кредиттік рейтингтің көтерілуі ел экономикасының тұрақты даму перспективаларын, экономиканы әртараптандырудың жалғасып жатқанын және жинақталған елеулі сыртқы әрі фискалдық буферлердің бар екенін көрсетеді. Агенттіктің бағалауынша, сыртқы сын-қатерлер мен әлемдік шикізат нарықтарындағы баға құбылмалылығына қарамастан, Қазақстан экономикасы тұрақтылығын сақтап, орта мерзімді перспективада өсуін жалғастырады", – делінген хабарламада.
Сарапшылардың болжамынша, 2026 жылы Қазақстанның нақты ішкі жалпы өнімі 5,1%-ға өседі. Ал алдағы кезеңде Қазақстан экономикасы мұнай экспорттаушы елдер арасында салыстырмалы түрде жоғары қарқынмен дамиды деп күтіледі.
S&P экономиканы әртараптандыруға бағытталған ауқымды инвестициялық бағдарламаның жүзеге асырылып жатқанын атап өтті. Шикізатты өңдеу мен инфрақұрылымды дамыту жобаларын, оның ішінде "Бәйтерек" ҰБХ арқылы қаржыландыру алдағы уақытта инвестиция көлемін жалпы ішкі өнімнің 30%-ына дейін арттыруға мүмкіндік береді.
S&P пікірінше, бюджет шығыстарының қалыпты өсу қарқыны және салық базасын кеңейту шаралары бюджет тапшылығын қысқартуға мүмкіндік береді.
"Валюталық активтердің көлемі қалыпты деңгейдегі сыртқы қарыздан айтарлықтай жоғары болған жағдайда Қазақстан сыртқы кредитор ретіндегі мықты позициясын сақтайды. Сондай-ақ агенттік банк секторының макроэкономикалық күйзелістерге төзімділігін атап өтті. Реттеу және қадағалау саясатын жүйелі түрде жетілдіру банк секторының тұрақтылығын арттырып, активтер сапасына байланысты жүйелік тәуекелдерді төмендетуге ықпал етті", – деп атап өтті Ұлттық экономика министрлігінде.
Бұған дейін Қазақстанның тәуелсіз кредиттік рейтингі "BBB-" деңгейінде болған.
