Танымал жазушы әрі қоғам қайраткері Мырзагелді Кемел өмірден озды
inform
Қазақтың белгілі жазушысы, мемлекет және қоғам қайраткері, экономика ғылымдарының докторы, Қазақстан Жазушылар одағының мүшесі Мырзагелді Кемел 71 жасқа қараған шағында дүниеден озды, деп хабарлайды zakon.kz.
Қаралы хабар negekz сайтының Инстаграмдағы парақшасында жарияланды.
Жазушының қайтыс болу себептері аталмайды.
Мырзагелді Кемел - 14 монографияның, 3 оқулықтың, 100-ден астам ғылыми мақаланың, руханият саласындағы 10 кітаптың авторы.
Мырзагелді Кемел 1949 жылы 15 қаңтарда Оңтүстік Қазақстан облысы, Мақтарал ауданында туған.
1971 жылы Ташкент ирригация және ауыл шаруашылығын механикаландыру инженерлері институтының ауыл шаруашылығын электрлендіру мамандығын, 2000 жылы М.Х.Дулати атындағы Жамбыл университетінің құқықтану факультетінің заңгер мамандығын тамамдаған.
Еңбек жолын 1971 жылы Мақтарал ауданындағы "Октябрьдің 30 жылдығы" совхозында аға инженер болып бастаған.
1975–1992 жж. Мақтарал ауданында партия, кеңес қызметінде болды.
1992–1994 жж. кеңшар директоры, 1994–1995 жж. Қазақстан Республикасы Жоғарғы Кеңесінің депутаты, 1995 жылы Қазақстан Республикасы Министрлер Кабинеті жанындағы шетел инвестициясы жөніндегі комитетінің сектор меңгерушісі болып қызмет атқарған.
1995–2004 жж. бірінші, екінші шақырылған Қазақстан Республикасы Парламентінің депутаты.
Руханият саласында 10 кітап шығарған, олардың ішінде өзі жазған ізгілікке, имандылыққа, білім-білікке, ақыл-парасатқа үндейтін танымдық-көсемсөздік еңбектерге қоса, қытай ақылмандары Лао Цзы мен Конфуцийді, испан пәлсапашысы Бальтасар Грасиан, ежелгі үрім және грек ақылмандарының афоризмдерін, қазіргі ілімдерді насихаттаушы Луиза Хей, бүгінгі күннің ең атақты жазушыларының бірі Пауло Коэльолардың таңдаулы еңбектерін қазақ тіліне тәржімалаған. "Дүние" және "Экология и устойчивое развитие" журналдарын шығарды. "Абзалдық әліппесі", "Өзіме сабақ" сияқты кітаптары оқырман қауымнан жоғары бағасын алған.
2004 жылы экономика ғылымының докторы ғылыми атағын алған. Қазақстан Республикасының Президенті жанындағы Мемлекеттік басқару академиясының профессоры.
