Нұр-Сұлтанда көшеде әйелдерге тап беретін ер адам ұсталды

lada.kz

Одан кемінде үш адам зардап шеккен.

Нұр-Сұлтанның полиция қызметкерлері елордалық әйелдерді күштеп тонап жүрген адамды ұстады, деп хабарлайды zakon.kz.

Елордалық тәртіп сақшылары 60 жастағы тонаушы күдіктіні ұстады.

Шамамен сағат 22: 00-де ол көшеде кетіп бара жатқан 18 жасар қызға тұтқылдан тап берген. Оның айтуынша, белгісіз біреу арт жағынан жүгіріп келіп, оны жерге құлатып, қолындағы ұялы телефонын тартып алмақ болған. Айғайлаған қыздың дауысы жан-жақтағы адамдардың назарын аударған. Осыдан сескенген ер адам қылмыс орнынан қашып кеткен. Бойжеткен болған жағдай туралы полицияға хабарлады. Полиция дереу қылмыс орнына барып, жүргізілген жедел-іздестіру іс-шаралары барысында күдікті ұсталды, - деп хабарлады елордалық полиция.

Полиция анықтағандай, ұсталған адамның белгілері қылмыс орнынан қашып кеткен қаскөйге сәйкес келеді, ол бұрын тағы екі әйелге шабуыл жасаған.

Басқа жәбірленушінің айтуынша, ол кешке жұмыстан үйіне қайтып келе жатқан кезде оған белгісіз біреу тап берген. Ер адам әйелді басынан бірнеше рет ұрғаннан кейін, оның қолынан ноутбук салынған сөмкесі мен жеке заттарын, ұялы телефонын тартып алып, белгісіз бағытқа қашып кеткен. Тағы бір жәбірленуші жанына өтіп бара жатқан ер адам кенеттен бұрылып, артынан келіп қолындағы ұялы телефонды жұлып алғанын айтады, - деп хабарлайды қалалық ПД.

Ұсталған адам - Өзбекстан Республикасының азаматы. Ол кінәсін мойындады. Ол ұрланған ноутбук пен әйелдердің бірінің жеке заттарын жерге көміп тастаған. Ұсталған адам Нұр-Сұлтан қалалық ПД-ның уақытша ұстау изоляторына қамалды. Қылмыстық іс қозғалды. Қазір тергеу амалдары жүргізіліп жатыр.

Оқи отырыңыз