Алматы облысында адам қағып, қашып кеткен Nissan жүргізушісі ұсталды

Алматы облысы ПД баспасөз қызметі

Күдікті Қарасай ауданының 31 жастағы тұрғыны болып шықты.

Алматы облысында бір тәулік ішінде полицейлер жаяу жүргіншіні қағып кеткен және оқиға орнынан ізін суытқан жүргізушіні ұстады, деп хабарлайды zakon.kz Алматы облысы ПД баспасөз қызметіне сілтеме жасап.

Қарасай АІЖ кезекші бөліміне Елтай ауылынан 19 сағат 30 минут шамасында анықталмаған көлік құралының жол-көлік оқиғасын жасап, сол болған жерден бой тасалап кеткені туралы хабарлама келіп түсті. Жәбірленуші ер адам ес-түссіз күйде ауруханаға жеткізілді, онда екі күннен кейін ол алған жарақатынан қайтыс болды. Аталған факт ҚР ҚК 345-бабы 2-бөлігі, 347-бабы бойынша СДТБТ-де тіркелді.

Алматы облысы ПД ЖПҚБ-нің іздестіру тобының полицейлері жедел-іздестіру іс-шараларының нәтижесінде бір тәулік ішінде Қарасай ауданының 31 жастағы тұрғыны болып шыққан күдіктіні анықтап, ұстады. Ұсталғандардың үйінің ауласынан тәртіп сақшылары "Nissan Largo" автокөлігін тауып алды. Барлық дәлелдермен әшкереленген күдікті кінәсін мойындады. Аталған факті бойынша сотқа дейінгі тергеу жүргізілуде, өзге ақпарат тергеу мүддесіне орай жария етуге жатпайды.