Алматы облысында көлік қаққан екі қыз баланың жағдайы ауыр
Pixabay
Алматы облысында мас жүргізуші қағып кеткен төрт қыздың жағдайына қатысты тың мәлімет жарияланды, деп хабарлайды zakon.kz.
Алматы облысы әкімдігінің хабарлауынша, жол апатынан зардап шеккен оқушы қыздар жатқызылған Шелек ауруханасына балаларға медициналық көмек көрсету үшін күн сайын Алматы облыстық балалар клиникалық ауруханасынан нейрохирургтар, травматологтар, реаниматологтар келіп-кетеді.
Қазіргі уақытта 2012 жылы туылған екі баланың жағдайы ауыр. 2011 жылы туған үшінші қыздың жағдайы орташа ауырлықта. Ол Алматы облыстық балалар клиникалық ауруханасында емделіп жатыр. Қазіргі уақытта оған травматологтардың қатысуымен ота жасалған. Аймақ басшысы Амандық Баталов мектеп оқушыларын оңалту үшін барлық қажетті шаралар қабылданып жатқанын атап өтті, деп хабарлады әкімдіктегілер.
Айта кетсек, 2 наурызда мас күйіндегі 54 жастағы УАЗ жүргізушісі жол шетінде тұрған төрт қызды қаққан. Куәгерлердің айтуынша, соққының қатты болғаны соншалық, мектеп оқушылары жан-жаққа шашылып, ұшып түскен. Салдарынан екі қыз комаға түсіп, бір қыз орташа дәрежеде жарақат алды. Төртіншісі шошып қалған. Бұл істі Қазақстан Республикасының Президенті жеке бақылауына алды.
