Мысырға ұшып шыққан лайнер Ақтауға қонуға мәжбүр болды

pixabay.com

Борттағы жолаушылардың бірі ішімдікті мөлшерден тыс тұтынып, тәртіп бұзғаны үшін ұшақтың қонуына тура келді.

Нұр-Сұлтан – Шарм-эль-Шейх бағытындағы әуе рейсі Ақтау әуежайына қонуға мәжбүр болды, деп хабарлайды Zakon.kz.

Борттағы жолаушылардың бірі ішімдікті мөлшерден тыс тұтынып, тәртіп бұзғаны үшін ұшақтың қонуына тура келді. 59 жастағы әйел әуе кемесіндегі тәртіп ережелерін бұзды.

Жолаушы әйел өзін агрессивті ұстап, бортсеріктердің ескертулеріне құлақ аспады, - деді Көліктегі полиция департаменті бастығының бірінші орынбасары Қалижан Қобландин.

Қобландиннің айтуынша, Ақтауда әуе кемесі командирінің актісі бойынша азаматша Желілік полиция бөлімінің қызметкерлеріне тапсырылған.

Көлік полицейлері әйелге қатысты ҚР ӘҚБтК-нің 440-бабының 1-бөлігі, "Алкогольдік ішімдіктер ішу немесе қоғамдық орындарға масаң күйде болу" және 566-бабының 1-бөлігі , "Әуе кемесіндегі мінез-құлық қағидаларын бұзу" бойынша әкімшілік хаттамалар толтырды, - деді Көліктегі полиция департаменті бастығының бірінші орынбасары Қалижан Қобландин.

Көліктегі полиция департаментінің баспасөз қызметі жыл басынан бері көлік полицейлері түрлі әкімшілік құқық бұзушылықтар үшін 40 мыңнан астам азаматты, оның ішінде алкогольдік ішімдіктер тұтынған және қоғамдық орындарға мас күйде болғаны үшін 3784 адамды әкімшілік жауапкершілікке тартқанын атап өтті.

Оқи отырыңыз