Алматыда су басу жөнінде шұғыл байланыс желісіне 11 хабарлама келіп түсті
Сурет: Алматы ТЖД
Сағат 10:30-дағы жағдай бойынша Алматыда "112" желісі мен "109" құтқару қызметіне үй ауласы мен көшелерді су басуға байланысты 11 хабарлама келіп түсті.
Оқиға орнына ТЖ басқармасының жауапты инспекторлары барды, су басқаны жөніндегі жеті хабарлама расталмады.
Жетісу ауданында Гончаров көшесінде ТЖД қызметкерлері бітеліп қалған арық құбырын тазалады.
Алатау ауданындағы Магаданская көшесіндегі мердігерлік ұйымның күшімен арық желісі тазартылды.
Наурызбай ауданында Сұраншы батыр көшесінде жеке үйдің ауласын су басып, оқиға орнында әкімдікке қарасты мердігерлік ұйымының қызметкерлері жұмыс істеді.
Түске дейін су басу бойынша барлық расталған жағдайлар бойынша жүргізілген жұмыстар аяқталды.
27 наурызда кешкі сағат 21:00-ден таңғы 09:00-ге дейін Алматыда 23 мм жауын-шашын түсті. Айдың басынан бері түскен жауын-шашынның көлемі - 146,1 мм, ал айлық қалыпты норма 76 мм болады.
"Қазселденқорғау" ММ бақылау бекеттерінің деректері бойынша, Кіші және Үлкен Алматы, Ақсай, Қарғалы өзендерінің бассейндерінде жағдай тұрақты. Су деңгейінің көтерілуі байқалмайды.
