Дикий Арманның ісі бойынша адвокаттар сот отырысына жіберілмей жатқаны жөніндегі ақпарат жоққа шығарылды

Сурет: Zakon.kz

2023 жылғы 14 қыркүйекте интернетте Арман Жұмагелдиевтің (Дикий Арман) қылмыстық ісі бойынша сот процесіне адвокаттардың кіруіне кедергі келтіріліп жатқаны жөнінде ақпарат тарады. Бұл ақпаратты Алматы қалалық сотының баспасөз қызметі жоққа шығарды, деп хабарлайды Zakon.kz.

Қалалық соттың Facebook-тегі парақшасында жарияланған мәліметке сүйенсек, процеске қатысушылардың барлығына сот отырысы өтетін орын, мекеменің ғимаратына кіретін жол жөнінде ескертпе жіберілген.

"Кей адамдар сотталушылар әкелінетін қызметтік кіреберіс арқылы өтпек болған. Оларға мекеменің бас бақылау-өткізу пункті арқылы кіру схемасы қосымша түсіндірілді. Ноутбуктарды, планшеттерді және басқа да құрылғыларды пайдалануға тыйым салынбаған, өйткені отырыс ашық режимде өтіп жатыр". Алматы қалалық сотының баспасөз қызметі

Ведомство өкілдерінің мәлімдеуінше, тергеу изоляторының аумағында ұялы байланысты пайдалану шектелгендіктен, құрылғыларды пайдалану кезіндегі ақаулар техникалық сипатта болуы мүмкін.

"72-мекеменің ғимараты ерекше қорғалатын нысан болғандықтан, аумаққа кірген кезде жеке басын куәландыратын құжаттар негізінде тексеру жүргізіледі". Алматы қалалық сотының баспасөз қызметі

Оқи отырыңыз