Өткен демалыста Ақмола облысында 30-ға жуық жол-көлік оқиғасы тіркелді

Ақмола облысы, жол-көлік апаты, қысқы кезең, қыс, қар, сурет - Zakon.kz жаңалық 23.10.2023 17:36

Сурет: Қостанай облысы ТДЖ баспасөз қызметі

Демалыс күндері Ақмола облысында 30-ға жуық жол-көлік оқиғасы болып, салдарынан көліктерге механикалық зақым келді. Күн суытуына байланысты полиция автокөлік иелерін көлікті қысқы кезеңге дайындауға шақырды, деп хабарлайды Zakon.kz.

Ақмола облысы полиция департаментінің 2023 жылғы 23 қазандағы мәліметі бойынша, өткен демалыс күндері патрульдік полиция батальоны мен ротасының нарядтары күшейтілген режимде жұмыс істеді: температураның төмендеуі және ылғалды қар түріндегі жауын-шашын жолдардағы жағдайды едәуір қиындатты.

"Ауа райына байланысты Көкшетау – Атбасар, Көкшетау – Рузаевка, Петропавл – Астана автожолдарында шектеу қойылды. Алайда демалыс күндері өңірде 30-ға жуық жол-көлік оқиғасы орын алып, салдарынан машиналарға механикалық зақым келді", – делінген өңірлік полиция департаменті таратқан хабарламада.

Полиция автокөлік иелерін көлікті қысқы кезеңге дайындауға шақырды.

"Өзара сыйластық пен тәртіп – жолдағы қауіпсіздіктің кепілі және апатты азайту мәселесіндегі шешуші факторлардың бірі".Ақмола облысы ПД баспасөз қызметі

Синоптиктер Қазақстанда күн суытып, қыс жақындап қалғанын ескертті.

Оқи отырыңыз