Маңғыстау облысында бір топ оқушы астан жаппай уланды
Сурет: Алматы қалалық әкімдігі
Lada.kz басылымы ата-аналар балаларының қызуы көтеріліп, жүрегі айнып, құса басталғаннан кейін шағымданғанын жазады.
Бесшоқы ауылының бірінші сынып оқушысының туыстарының бірінің айтуынша, №8 мектептің бірінші ауысымдағы 1-4 сынып оқушылары сабақтан үйге келгеннен кейін өздерін жаппай нашар сезінген.
"Менің қарындасым мектептен қатты шаршап келді, ұйықтағысы келетінін айтты. Ал кешке оянғанда жүрегі айнып, дене қызуы 39,2 градусқа дейін көтерілді. Біз оны Маңғыстау ауылының ауруханасына апардық", - дейді оқушы қыздың үлкен ағасы.
Зардап шеккен бірінші сынып оқушысының туыстары Бесшоқы ауылында аурухана науқастарға толып кеткенін, кезек пайда болғанын айтты. Сол жердің өзіне 50-ден астам бала жеткізілген. Куәгерлер Маңғыстау ауылының медициналық мекемесінде 35-40 шақты оқушыны байқағандарын айтады.
Балаларын Ақтаудың 26 ықшам ауданында орналасқан Маңғыстау облыстық балалар ауруханасына жеткізгендер де бар, делінген басылым келтірген ақпаратта.
Өңірдің денсаулық сақтау басқармасы аталған жағдайға түсініктеме берді.
"6 қыркүйекте кешке №8 мектептің 21 оқушысының ата-аналары жедел жәрдем қызметіне жүгінгендерін айтты. Балалар іштері ауырып, дене қызуының көтерілгеніне шағымданған. Сағат 13:15-тегі жағдай бойынша 58 бала медициналық көмекке жүгінді. Емханада 26 бала, ауруханада бес бала ем алуда, өз үйінде дәрігерлердің бақылауымен емделіп жатқан тағы 27 бала бар", деп хабарлады ақ халаттылар.
Қалыптасқан жағдайдың себептерін анықтау үшін Маңғыстау облысының санитарлық-эпидемиологиялық қадағалау бөліміне хабарлама жіберілді.
