ҰҚК ірі кокаин партиясын тәркіледі

Қазақстанның Ұлттық қауіпсіздік комитеті (ҰҚК) ел тарихындағы кокаиннің ең ірі партиясын тәркілегенін мәлімдеді, деп хабарлайды Zakon.kz.

ҰҚК-нің 2025 жылғы 5 қыркүйектегі мәліметіне сәйкес, халықаралық есірткі контрабандасы арнасы жойылған.

"Дер кезінде қабылданған шаралардың нәтижесінде Алматы қаласында республика тарихындағы есірткінің ең ірі – 13 тонна 183 килограмм кокаин партиясы тәркіленді", – делінген ҰҚК баспасөз қызметінің хабарламасында.

Комитеттің мәлімдеуінше, жүктің бағыты Қазақстан арқылы үшінші елдерге транзитпен өткізуді көздеген.

"Есірткі арнасын ұйымдастыруға қатысы бар деген күдікпен екі шетел азаматы ұсталып, қамауға алынды", – деп атап өтті баспасөз қызметі.

Қазір Қылмыстық кодекстің 297-бабының 3-бөлігі бойынша сотқа дейінгі тергеу жүргізілуде.

Істің өзге мәліметтері Қылмыстық-процестік кодекстің 201-бабының 1-бөлігіне сәйкес жария етілмейді.