Елорда полицейлері аялдама әйнегін сындырған ер адамды тауып алды

Ер адамның өрескел әрекеті Нұр-Сұлтан полиция департаментінің жедел басқару орталығының бейнебақылау камерасына түсіп қалған. Полицейлер бұзақыны тапты, деп хабарлайды Zakon.kz.

Оқыс оқиға Бөгенбай батыр даңғылында түнгі сағат 00:39-да орын алды.

Видеодан көрініп тұрғандай, белгісіз ер адам аялдамаға жақындап келіп, қолындағы затты лақтырып, әйнекті сындырғанын көруге болады.

Полиция 32 жастағы қала тұрғынын ұстады. Ер адамның айтуынша, ол мас болған.

Ол жердегі тас төсеменің бір түйіршігін алып, аялдамаға қарай лақтырып, қашып кеткенін мойындады.

Аталған факті бойынша ҚР ҚК 293-бабы "Бұзақылық" бойынша сотқа дейінгі тергеу шаралары қолға алынды.