"Тоғыз адамның алтауы қаза тапты". Алматы облысында ауыр жол апаты орын алды

13 қазанда сағат 17.30 шамасында Алматы облысының Еңбекшіқазақ ауданында Mercedes және Subaru автокөліктері соқтығысып, ауыр жол апаты орын алды. Салдарынан 6 адам қаза тапты, тағы үшеуі түрлі дене жарақатымен ауруханаға жеткізілді, деп хабарлайды Zakon.kz.

Алдын ала мәліметтер бойынша 28 жастағы Mercedes жүргізушісі Алматы - Көкпек - Көктал тас жолының 69 шақырымында қарсы қозғалыс жолағына шығып, Subaru көлігімен жанамалы соқтығысуға жол берген. Онымен тоқтамай, Mercedes жол жиегіндегі ағашқа соғылған.

Оқиға орнында Mercedes көлігінде болған 6 адам қаза тапты, олардың төртеуі - кәмелетке толмағандар. Әр түрлі жарақаттармен зардап шеккен тағы 3 адам жақын маңдағы ауруханаға жатқызылды. Айта кету керек, ескі Mercedes-те 9 адам болған, оның алтауы - кәмелетке толмағандар.

Қазіргі уақытта полиция қызметкерлері барлық мән-жайларды анықтау үстінде. Аталған факті бойынша қажетті сараптамалар тағайындалды. Сотқа дейінгі тергеп-тексеру басталды.