Жасөспірім араздасып қалған құрдасының атынан "жарылғыш зат" туралы хабарлама таратқан

Жасөспірім, Атырау облысы, жарылғыш зат, жалған хабарлама, сурет - Zakon.kz жаңалық 21.12.2023 19:05

Сурет: polisia.kz

Атырау облысында жасөспірім құрдасының атынан мессенджер арқылы мектепте "жарылғыш зат" бары туралы хабарлама таратқан. Оған екеу арасындағы дүрдараздық себеп болған, деп хабарлайды Zakon.kz.

Атырау облысының полиция департаменті экстремизмге қарсы іс-қимыл басқармасының қызметкерлері ҰҚК департаментінің терроризмге қарсы орталығымен бірлесіп, Атырау облысы Жылыой ауданының мектебінде жарылғыш зат туралы жалған хабарлама жолдаған аудандық мектептің бірінің 9-сынып оқушысын анықтады.

Жасөспірім полицейлерге мессенджерде анонимді аккаунт ашып, одан дабыл сигналын жолдағанын айтты. Оқушы Telegram-чатта құрдасымен әңгімелесу барысында сөзге келіспей қалғандықтан осындай әрекетке барған көрінеді.

"Аталған фактіге сәйкес, ҚР Қылмыстық кодексінің 273-бабы бойынша қылмыстық іс қозғалды. Сонымен қатар ата-анасының үстінен Әкімшілік құқық бұзушылықтар туралы кодекстің 127-бабы бойынша ата-аналардың бала тәрбиесі жөніндегі міндеттерін орындамағаны үшін әкімшілік материал жинақталды", делінген облыстық ПД хабарламасында.

Оқи отырыңыз