Назарбаев Бозымбаевқа жариялаған сөгісті алып тастады

Мемлекет басшысы елдегі жанар-жағармай материалдары тапшылығы жағдайына байланысты Бозымбаевқа сөгіс жариялаған болатын.

Қазақстан Президенті Нұрсұлтан Назарбаев өткен жылдың күзінде Энергетика министрі Қанат Бозымбаевқа жариялаған сөгісті алып тастады, деп хабарлайды Baq.kz ақпарат агенттігі ria.ru сайтына сілтеме жасап.

Мемлекет басшысы 2017 жылдың 11 қазанында елдегі жанар-жағармай материалдары тапшылығы жағдайына байланысты Бозымбаевқа сөгіс жариялаған болатын.

Бір күн бұрын Қазақстан Министрлер кабинетінің басшысы Бақытжан Сағынтаев Энергетика министрлігі басшысының орынбасары Әсет Мағауовты жұмыстан шығарған болатын. Сондай-ақ, ол «ҚазМұнайГаз» ҰК АҚ Басқарма төрағасына сөгіс түрінде тәртіптік жаза тағайындауды және оның орынбасары Данияр Берлібаевтың өкілеттігін тоқтатуды тапсырды.

Мемлекет басшысы елдегі жанармай жетіспеушілігі Қазақстан үкіметі мен Энергетика министрлігінің жанар-жағармай материалдары нарығын қамтамасыз етуге қатысты шараларды уақытылы қолға алмауының нәтижесі екенін атап өтті. Мемлекет басшысының айтуынша, елдегі жанар-жағармай материалдары тапшылығы жағдайы үкімет пен энергетика министрлігі «салғырттық пен жауапсыздыққа» жол бергенін көрсетеді.