Сәбиін еденге ұрған әйел аналық құқығынан айырылды
![www.inform.kz, сурет - Zakon.kz жаңалық 03.03.2018 21:12](https://kaz.zakon.kz/pbi/WEBP/2023-12-20/file-3e39f4df-0970-48a6-aea8-a45ebcf1f429/800x452.webp)
Алматы облысының Қарасай ауданындағы №2 кәмелетке толмағандардың істері жөніндегі мамандандырылған ауданаралық соты Талғар ауданының білім бөлімі түсірген талап арызды қанағаттандырды, деп хабарлайды ҚазАқпарат.
7 айлық сәбиін еденге ұрған Марина Тюменцева және оның азаматтық некедегі жолдасы К. Овсянников ата-аналық құқығынан айырылды.
Сот қаулысына сәйкес, М. Тюменцева балалары кәмелеттік жасқа толғанға дейін алимент төлеуге міндеттелді. Яғни, ол 19.01.2018 жылдан бастап айлық табысының 1/3 бөлігін ай сайын балаларының жеке шотына жіберіп отыруы тиіс. Ал оның азаматтық некедегі жолдасы К. Овсянников қызына ай сайын табысының ¼ бөлігін төлеп отыруы керек.
Ал кәмелеттік жасқа толмаған үш баланы қамқорлыққа алып, оларды орналастыру мәселесі Талғар ауданының білім бөліміне жүктелді. Естеріңізге сала кетейік, Марина Тюменцева 7 айлық сәбиін еденге ұрғаны үшін ҚР ҚК 140 бабы 2 бөлігі бойынша сотталып, оған 25 АЕК көлемінде айыппұл салынған болатын.
Артынша Талғар ауданының білім бөлімі қатыгез ананы және оның азаматтық некедегі жолдасын ата-аналық құқығынан айыру туралы сотқа арыз түсіргенін бұған дейін хабарлаған болатынбыз.