Шығыс Қазақстанда аюлар төрт түлікке шабуылдауда

Baq.kz

Облыстың көп жерінде аюдың шабуылдау жағдайы тіркеліп жатыр.

Өңірде жыртқыш аңдардың омарта мен төрт түлікке шабуылдау жағдайы бірнеше рет болған, деп хабарлайды Baq.kz.

Еске сала кетсек, Ұлан ауданының маңындағы ауылдардың бірінде аю алты сиырды жарып кеткен болатын. Бұл облыс аумағында болған бірінші жағдай емес екені анықталды.

«Облыстың көп жерінде аюдың шабуылдау жағдайы тіркеліп жатыр. Олар омартаны ойрандап, малды қырып кетеді. Көбінесе үй жануарлары олардың құрбаны болып жатады. Аюдың алты сиырды жарып кетуі – сирек кездесетін қатігездіктің белгісі. Олардың көзін құрту керек», - дейді Шығыс Қазақстан облысы табиғи ресурстар және табиғатты пайдалануды реттеу басқармасы орман және аңшылық шаруашылығы жасағының жедел әрекет ету бөлімі бастығының орынбасары Василий Ткаченко.

Алайда, аюды өлтіруге қатысты жоспары жоқ.

«Бізде аңды өлтіруге заңды түрде құқығымыз жоқ. Рұқсат алу үшін көптеген құжат жинау керек. Ол құжаттарды жинағанша аю ізін жасырады. Біз қазірдің өзінде оны қайдан іздеу керек екенін білмейміз», - дейді ол.

Аңшылар аю Ұлан ауданында басқа да төрт түлік малға шабуыл жасауын жалғастыруы мүмкін екенін айтады. Оның табиғи мекен ететін жерінде қазіргі уақытта айтарлықтай қорек жоқ, сол үшін ол ауылдарды жағалауға мәжбүр.

Оқи отырыңыз