Қазақстанда орташа жалақы көбейіп, 160 мың теңгеге жуықтады

sputniknews.kz

Министр Тимур Сүлейменов биыл жарты миллионға жуық адамның жұмыспен қамтылғанын айтты.

Қазақстанда 11 айдың көрсеткіші бойынша орташа айлық жалақы 159,5 мың теңгеге дейін өсті. Бұл туралы үкімет отырысында ұлттық экономика министрі Тимур Сүлейменов айтты, деп хабарлайды Sputnik Қазақстан тілшісі.

ҚР Ұлттық экономика министрлігі басшысының айтуынша, 2018 жылдың басынан бері 468 600 адам жұмысқа орналастырылды.

"Қазан айынды жұмыссыздық 4,8%-ке төмендеді. Жалақы мөлшері қарқынды түрде өсіп келеді. Қаңтар-қазан айларында орташа жалақы 159,5 мың теңгеге дейін жетті. Нақты 2,2% өсіп отыр", — деді Сүлейменов.

Сондай-ақ, министр ЖІӨ үш ай ішінде 4,1% деңгейінде сақталып отырғанын айтты. Экономиканың өсуіне жоғары инвестициялық және тұтынушылық сұраныс, экономиканың базалық салаларындағы өндірістік белсенділік әсер еткен.

"Инфляция деңгейі 5-7% аралығында сақталды. Жылдық инфляция 4,6%-ті құрады. Экономиканың өсуіне негізінен капиталға салынған инвестициялар әсер етіп отыр. Биыл 11 айда олардың көлемі 18,3% өсті. 1 қарашадағы жағдай бойынша елдің халықаралық резервтері 85,5 миллиард АҚШ долларын құрады. Бұл ретте ұлттық қордың активтері 0,1% өсіп, 56,5 миллиард АҚШ долларына дейін ұлғайды", — деді ұлттық экономика министрі.

Бұдан өзге министр ауыл шаруашылығы қарқынды дамып жатқанын айтып өтті. 11 ай ішінде бұл саладағы өнім көлемі 2,9% ұлғайған. Өсімнің негізгі салымын мал шаруашылығы қамтамасыз етіп отыр.

Оқи отырыңыз