Парламент Сенатының отырысында бірқатар заң жобасы қабылданды

Педагог, дәрігер, полиция қызметкерлері және өзге де мамандар үшін "7-20-25" бағдарламасының алғашқы жарнасын жергілікті бюджеттен субсидиялау енгізілмек.

Парламент Сенатының отырысында бірқатар заң жобасы қабылданды. Олардың арасында қоғамда дау тудырған әлеуметтік мәселелерді қамтитын құжаттар да бар, деп хабарлайды Zakon.kz 24.kz-ке сілтеме жасап.

Атап айтқанда, Экономикалық және индустриялық аймақтар, инвестиция тарту, экспортты дамыту және ілгерілету, сондай-ақ әлеуметтік қамсыздандыруға арналған заң жобасын депутаттар екінші оқылымда қабылдады.

Айта кетсек, құжат аз қамтылған отбасылардағы әрбір балаға арналған ең төменгі төлемді 20 789 теңге мөлшерінде белгілеуді көздейді. Сондай-ақ мүгедек бала тәрбиелеп отырған ата-аналарға арналған жәрдемақыны көбейтуді қарастырады.

Бұдан бөлек педагог, дәрігер, полиция қызметкерлері және өзге де мамандар үшін "7-20-25" бағдарламасының алғашқы жарнасын жергілікті бюджеттен субсидиялау енгізілмек.