Алматыдан Қарағандыға ұшақпен 6 мың теңгеге баруға болады
today.kz
Алматыдан Қарағандыға ұшақпен 6 мың теңгеге баруға болады. Бұл жайында "FlyArystan" бюджеттік әуе компаниясының Инстаграмдағы парақшасында жарияланды, деп хабарлайды ҚазАқпарат.
Таратылған ақпаратқа қарағанда, Алматыдан Қарағандыға бір бағыттағы билет құны 5 999 теңгеден басталатындығы айтылған. Сонымен қатар, бұл сомаға қосымша сервистік алымдар қосылуы мүмкін екені ескертілген.
Бұған дейін мамыр айыннан бастап жолаушыларға қызмет көрсете бастайтын Қазақстанның алғашқы лоукостері "Fly Arystan" компаниясы билет бағасының төмен болуына бірнеше фактор себеп екендігін мәлім еткен болатын.
"Үнемділік бірнеше факторға байланысты. Лоукостерлер жанармайды үнемді түрде жұмсайтын жаңа ұшақтарды пайдалануды артық көреді. Бизнес класстың болмауы отыратын орындықтардың санын арттырады. Ұшақтың бір түрін пайдалануы, әлемдік қауіпсіздік стандарттарына сай болу үшін техникалық қызмет көрсетуі және экипаж оқуы бір бағдарлама бойынша өтеді. Билеттерді неғұрлым ерте сатып алсаңыз бағасы соғұрлым арзанға түсетін болады", - деп атап өтеді компания өкілдері.
Fly Arystan компаниясы ұшақтарында жолаушылар өздерімен 5 келіге дейін ғана жүкті тегін алып жүре алады. Егер қол жүгіңіздің салмағы 10 келіге жете қабыл болса онда ұшу ұзақтығына байланысты 2500-3000 теңге төлеуіңізге тура келеді. Ал қол жүгіңізден бөлек затыңыздың салмағы 15 келі болса 3 500 теңге, 20 келіге 4 000 теңге, 60 келіге 12 мың теңге т24өлейсіз. Ұшу уақытыңыз 2,5 сағаттан асып кетсе, онда аталған салмақтағы жүгіңізге төлейтін 1 мың теңгеге қымбатқа түседі.
Ұшақпен үй жануаларларын алып жүруіңізге де болады. Жануарды бортқа алып кірсеңіз ұшу уақытына байланысты 6 000-8 000 теңге, жүк бөлімімен алып жүрсеңіз 20 000-26 000 теңге шығындайсыз. Спорттық керек-жарақ алып жүру үшін де 5-7 мың теңге мөлшерінде ақша төлейсіз. Ұшақта орын таңдау да ақылы. Өзіңіз қалаған орынға отыру үшін 1 500-7 000 теңге аралығында қаражат жұмсауыңызға тура келеді.
