Мамин мен ХВҚ-ның Қазақстандағы миссиясының басшысы не туралы сөйлесті
primeminister.kz
ҚР Премьер-министрі Асқар Мамин Қазақстан бойынша миссиясының басшысы Марк Хортонның жетекшілігімен Халықаралық валюта қорының сарапшыларымен кездесу өткізді, деп хабарлайды Zakon.kz Үкіметтің ресми сайтына сілтеме жасап.
Үкімет басшысына Қазақстандағы экономикалық ахуал туралы ХВҚ сараптамалық бағалаулары мен болжамдары ұсынылды, олар биылғы қараша айындағы Қор қызметкерлерінің Қазақстан Республикасына сапарының қорытындысы бойынша миссияның Қорытынды мәлімдемесіне енгізілген.
Миссия Қазақстандағы экономикалық өсудің жоғары қарқыны сақталғанын нақтылады, бұл негізінен мұнайлық емес сектордың, ең алдымен, құрылыс және көрсетілетін қызметтер саласының есебінен қамтамасыз етілді.
"Алдын-ала бағалаулар үшінші тоқсандағы үдеуді көрсетеді. Басты факторлар – тұтыну көлемінің артуы және инвестициялық қызметтің жалғасуы. Бұл бюджеттің қолдауымен, бөлшек несиелендірудің жоғары өсімімен, сондай-ақ, мұнай-газ саласындағы инвестициялық жобалармен себептеледі", — делінген ХВҚ миссиясының Қорытынды мәлімдемесінде.
Үкімет басшысы Қазақстан экономикасы осы жылдың 10 айының қорытындысы бойынша тұрақты өсу беталысын көрсетіп отырғанын атап өтті. Қазақстанның ЖІӨ өткен жылдың сәйкес кезеңімен салыстырғанда 4,4%-ға артты.
Тараптар ақша-несие, бағам, салық-бюджет саясаты, банк саласындағы ахуал, Қазақстанда жүргізіліп жатқан экономикадағы құрылымдық реформалар, сондай-ақ, 2020 жылы Алматыда Кавказ, Орталық Азия және Моңғолия елдеріне арналған ХВҚ-ның техникалық көмек бойынша Аймақтық орталығының ашылуы мәселелерін талқылады.
Кездесуге Премьер-министрдің Бірінші орынбасары – қаржы министрі Әлихан Смайылов, ұлттық экономика министрі Руслан Дәленов, сауда және интеграция министрі Бақыт Сұлтанов, индустрия және инфрақұрылымдық даму министрі Бейбіт Атамқұлов, сыртқы істер министрінің орынбасары Ермек Көшербаев және басқа да ведомстволардың өкілдері қатысты.
ХВҚ миссиясы ХВҚ Келісім Бабының IV Бабына сәйкес жыл сайынғы консультациялар өткізу үшін жылына екі рет Қазақстанға келеді.
