42 500 теңге ала алмаған Шымкент тұрғындары Нұр-Отанның алдында шу шығарды
видеодан алынды
Шымкенттің шенділері 42 500-ді сұрап келген көпбалалы аналар, мүгедектер мен жетім-жесірлерді сандалтып қойған. Әлеуметтік төлемнен дәмелілер әкімдіктерге барса, ондағылар мәселені қарамай-ақ, бірден "Нұр-Отанға" сілтейді екен. Амалы таусылған жарымжан жандар мен жалғызбасты аналар партия филиалының алдын босатпайтын болған, деп хабарлайды КТК телеарнасы.
Айгүл Байысбаева, Шымкент қаласының тұрғыны:
- Кеше көршілерім тамақ берді, біреу – картобын, біреуі – майын. Сонымен күн көріп жүрмін.
- Қарызға кірдіңіз бе?
- Кіргенде қандай!
- Қанша?
- 12 мыңнан асып кетті, картошка, наным. Міне Құдай тұр, барып дүкеннен сұра. Қарызымды бере алмай отырмын. 42 мыңға өтініш бергенмін, берілмейді деен жауап келді.
Көз жасы көл болып тұрған жалғызбасты бұл әйел мүгедек баласымен пәтерде тұрады екен. Төтенше жағдай кезіндегі әлеуметтік көмектен де қағылған. Есесіне, 42 500 бен "Біргеміз" қорынан берілетін 50 мың теңге жағдайы жақсыларға түсіп жатыр екен. Көмек сұрап барғандарды әкімдік партияға сілтеп, мұқтаж жандардың ары-бері сандалғандарына 10 күн болған. Таңнан қара кешке дейін жөнін айтар шенеунік таппағандардың кейбірі тіпті есінен танып құлап та жатыр. Оларды сол жерді күзетіп жүрген полицейлер мен жанындағы әйелдер демеп, су бүркіп әуре. Ал нұротандықтар әлеуметтік көмек алатындардың тізімі де, түсіндіру жұмыстары да аудандық әкімдіктердің мойнында екенін айтады. Сондықтан өз жұмысын өзге мекемеге жүктегісі келетін әріптестеріне өкпелі.
Бахадыр Нарымбетов, "Нұр Отан" партиясы Шымкент қалалық филиалының бірінші орынбасары:
- Бізге келетін 20-30 адамның жартысынан көбі 42500 сұрайды. Оған "Нұр Отан" партиясының ешқандай қатысы жоқ. Егер де аудан әкімдіктерінің қызметкерлері "Нұр Отанға" жіберіп отырса, олар өз міндеттерін басқа біреуге жүктегісі келіп отыр. Жалпы, бұл дұрыс емес. Біз бұл мәселені қала әкімінің алдында да айттық. Бұл мәселеге мұқият қарау керек.
