Елімізде экологиялық білім беру жөніндегі үйлестіру кеңесі құрылатын болды
gov.kz
Қазақстандық мектептерде жаңа экологиялық білім беру пәнін енгізу үшін жауапты мемлекеттік органдар үйлестіру кеңесі құрылады. Бұл туралы онлайн брифинг барысында ҚР Экология, геология және табиғи ресурстар министрі Мағзұм Мырзағалиев мәлімдеді, деп хабарлайды zakon.kz.
Экология министрлігінің бастамасымен "Балаларға экологиялық білім беру" тақырыбына арналған онлайн конференцияға ҚР Экология, геология және табиғи ресурстар министрі Мағзұм Мырзағалиев, ҚР Білім және ғылым министрі Асхат Аймағамбетов және ҚР Ақпарат және қоғамдық даму министрі Аида Балаева, ғалымдар, сарапшылар мен қоғам белсенділері, педагогтар және ата-аналар қатысып өз ұсыныстарын айтты.
“Көптеген жақсы ұсыныстар мен пікірлер айтылды. Нәтижесінде біз экологиялық білім беру жөніндегі үйлестіру кеңесін құруға келістік. Оның құрамына мемлекеттік органдардың, білім беру ұйымдарының, үкіметтік емес және халықаралық ұйымдардың өкілдері, қоғам қайраткерлері кіреді. Кеңесте экологиялық білім берудің өзекті мәселелері талқыланады",- деді Мағзұм Мырзағалиев.
ҚР Экология, геология және табиғи ресурстар министрі Мағзұм Мырзағалиевтің айтуынша, жақында ғана Мемлекет басшысының экологиялық мәселелерді шешуге қатысты берген тапсырмасы қоғам тарапынан өте қызу талқыға түсуде. Сарапшылар, ғалымдар, саясаткерлер, ел азаматтары мен оқушылар бұл мәселеге қатысты өз ойларымен бөлісуде.
Мағзұм Мырзағалиевтің сөзінше, экологиялық білім беру дегеніміз мектеп бағдарламасына бір ғана пән енгізумен шектелу емес. Бұл күрделі әрі кешенді жұмысты талап етеді. Қоғам өкілдері, сарапшылар, ғалымдар ұсынған мәселелер жаңа бастаманы жүзеге асыруға септігін тигізеді деп ойлаймын. Экологияға дұрыс көзқарас қалыптастырған ұлтты тәрбиелеу - ортақ міндет. Бұл орайда әр отбасындағы ата-ана тәрбиесінің маңызы зор,- деді министр.
"Қазақстанның бүгінгі экологиялық мәселелері қоғамға белгілі. Ол ауа мен судың ластануы, өндірістік қалдықтар, қатты тұрмыстық қалдықтардың өңделуі сияқты мәселелер. Соңғы уақытта жан-жануарлар мен табиғатқа зиян келтіру деректері көп тіркелуде. Осының барлығын шешу үшін бірінші кезекте экологиялық білім қажет", - деді Мағзұм Мырзағалиев.
Ал ҚР Білім және ғылым министрі Асхат Аймағамбетов болса, экологиялық білім беру мәселесі өте орынды әрі кезек күттірмес шаруа екенін айтты. Қоғамың бұған белсене араласуы мұны кезекті рет айшықтап отыр. Біз Мемлекет басшысының тапсырмасын сапалы орындауымыз керек. Қоғам тарапынан ұсыныстар көп түсуде. Оның барлығы ол ескерілетінін айтты.
"Қалай болса да, асығыс бірінші қыркүйекке дейін дайын болсақ та, болмасақ та сабақты енгізейік деген мәселе алдымызда тұрған жоқ. Ең бірінші кезекте осыны айтқым келеді. Біз берілетін білімнің мазмұнын, баланың жас ерекшелігіне сәйкес келетіндігін, әдістемесін жан жақтан бірге қарастырып, ұйымдастырамыз. Көп мәселе ойын арқылы, тәжірибе арқылы, қолмен жасап шығару арқылы, олимпиадалар арқылы жүргізілуі керек. Бала тек қана құлағымен естіп қана қоймай, қолымен жасап, іс әрекетпен осы жұмысқа қатысса, сонда ғана жақсы нәтижеге жетуге болады",- деді Асхат Аймағамбетов.
Ал бір кездері экономика және сауда, одан кейін білім және ғылым министрі болған Жақсыбек Күлекеев болса, осы бастан экологиялық білім беру жүйесінің жүзеге асырылу жолын айқындап алу керектігіне баса назар аударды.
"Бір мәселенің басын шешіп алуымыз керек. Бізде екі жол бар. Біріншісі, мектепке экология пәнін енгізу. Екіншісі, барлық пәндерді экологияландыру. Яғни мәселенің түп-тамырына үңілу керекпіз. Мысалы, Ресей экология пәнін мектепке енгізумен ғана шектелді. Алайда одан мәселе шешілген жоқ. Онда экология пәнін жоғары сыныптарға ғана енгізді. Ал оқушылардың жартысы ол кезде колледждерге немесе арнаулы білім беру ордаларына оқуға түсіп, мектептен кетіп қалады. Демек, экологиялық білімі жетілмей сол күйінде қалады",-деді Жақсыбек Күлекеев.
ҚР Ақпарат және қоғамдық даму министрі Аида Балаева болса, қай уақытта да экологиялық мәселелерді айналып өту мүмкін емес екендігін айтты.
- Қазір елімізде экология мәселесі бойынша бар болғаны 170 үкіметтік емес ұйым жұмыс істейді. Бұл барлық үкіметтік емес ұйымдардың 3,3% құрайды. Сондай-ақ, мемлекеттік тапсырыс бойынша әлеуметтік жобалар саны 2044 болса, оның тек 2% немесе 21-і ғана экология тақырыбына арналған. Экология мәселесін оңтайлы шешу үшін отбасындағы ата-аналардың да тәрбиелік маңызы зор,- деді министр.
ҚР Экология, геология және табиғи ресурстар министрі Мағзұм Мырзағалиев алдағы уақытта да экология пәнін мектеп бағдарламасына енгізуге арналған жұмыстар қоғаммен талқылана отырып, кешенді түрде жүргізілетінін мәлімдеді.
Естеріңізге сала кетейік, 10 шілде күні ҚР Президенті Қасым-Жомарт Тоқаев қазақстандық мектептерде "экологиялық білім беру" пәнін енгізуді тапсырған болатын.
