Венада зардап шеккендер арасында қазақстандықтар жоқ - ҚР СІМ
Kursiv.kz
Австриядағы елшіліктің алдын-ала ұсынған ақпараты бойынша, Венада қаза тапқандар мен жарақат алғандардың арасында қазақстандықтар жоқ, деп хабарлайды zakon.kz Қазақстан Республикасы Сыртқы істер министрлігіне сілтеме жасап.
2 қарашада Австрия астанасы Венада белгісіз қаскөйлер бірнеше жерге қарулы шабуыл жасады. Соның ішінде мінажат орны - Синагога да бар.
Тәртіп сақшыларының айтуынша, бір қарулы каскөй залалсыздандырылған және кем дегенде тағы бір адам іздестірілуде.
Вена мэрі кем дегенде 15 адам жарақат алды, олардың барлығы ауруханаларға орналыстырылды, жетеуі ауыр жарақат алған, деп мәлімдеді. Сондай-ақ қала басшысы екі адамның қаза тапқанын айтты, ал Ішкі істер министрлігі "бірнеше адам" деп қаза тапқандар санына қатысты нақты мәлімет бермей отыр.
Австрия канцлері Себастьян Курц бұл оқиғаның теракт екенін айтты. Австрияның ішкі істер министрі Венадағы шабуылды кем дегенде бір исламшыл террорист жасады деп мәлімдеді.
