Талғардағы МӘС бөлімінің дөрекі қызметкерлерін тексеру басталды
видеодан кадр
Еңбек әлеуметтік қорғау және көші-қон комитетінің Алматы облысы бойынша аумақтық департаменті Талғар қаласының №4 медициналық–әлеуметтік сараптама (МӘС) бөлімінің қызметкерлеріне қатысты қызметтік тергеу жүргізеді, деп хабарлайды zakon.kz.
Тексеру №4 МӘС бөлімінің қызмет алушыларының қызметкерлердің олармен дөрекі қарым-қатынас жасауына шағымдары негізінде басталған. Әрбір жағдайды қарау барысында МӘС барлық бөлімдерінде орнатылған жабдықта жүргізілетін аудио - және бейнежазбалар пайдаланылатын болады.
Тексеру нәтижелері туралы қосымша хабарланады.
Бұған дейін Департаменттің әдіснама және бақылау бөлімі №4 МӘС бөлімінде куәландырудан өткен және онда мүгедек деп танылмаған 5 азаматтың шағымы бойынша куәландыру жүргізді. Шағымданған жағдайларды қарау нәтижелері бойынша қорытындылар негізді деп танылды, өйткені медициналық құжаттарды объективті қарау және талдау кезінде азаматтарда организм функцияларының тұрақты бұзылуы және тіршілік әрекетінің шектелуі анықталған жоқ.
Естеріңізге сала кетейік, "Медициналық-әлеуметтік сараптама жүргізу қағидаларына" сәйкес МӘС бөліміндегі сараптамалық қорытындылар МӘС куәландыруға құжат тапсырған азаматқа қызмет көрсететін медициналық ұйым ресімдейтін ұсынылған медициналық құжаттарды объективті тексеру, талдау негізінде шығарылады. Тексерулердің толықтығы, емдеу және оңалту іс-шараларын жүргізу, пациенттерді МӘС-ке жіберудің уақтылығы мен негізділігі үшін медициналық ұйымның дәрігерлік-консультациялық комиссиясы жауапты болады.
