Депутат Үкіметтің Жер кодексіне қатысты жұмысын сынап тастады
azh.kz
Депутат Айбек Паяев Қазақстан Республикасы Парламенті Мәжілісінің жалпы отырысында Асқар Маминге депутаттық сауал жолдап, Жер кодексінің проблемалық мәселелерінің шешімі бойынша Үкіметтің тиімді жұмыс жүргізбей жатқандығын айтты, деп хабарлайды zakon.kz тілшісі.
Паяев Мемлекет басшысының Қазақстан халқына Жолдауында: "Біздің жер шетелдіктерге сатылмайды. Бірақ үкімет ауылшаруашылық жерлерін толыққанды экономикалық айналымға енгізудің басқа жолдарын әзірлеуі керек" деп айтқанын еске түсірді.
Өздеріңіз білетіндей, Қазақстан Республикасы Ұлттық экономика министрлігінің бастамасымен Жер кодексіне ауылшаруашылық мақсатындағы жерлерді Қазақстан азаматтарына сату, сондай-ақ Қытайдан келген қандастарымызға жалға алу мерзімін 25 жылға ұзарту туралы түзетулер енгізілді. Бұл түзетулер ел азаматтарына түсіндіріліп, жаңа заң 2016 жылдың 1 шілдесінен бастап өз күшіне енуі керек еді, деп нақтылады депутат.
Сонымен бірге, оның айтуынша, уәкілетті органдардың заң нормаларын дұрыс түсіндірмеуіне байланысты ел арасында пікірталастар туып, наразылықтар өршіді, шетелдіктер жерге иелік етпес үшін қазақстандықтар ауылшаруашылық жерлерін сатып алуға мәжбүр деген сияқты жаңсақ ойлар айтылды.
Нәтижесінде 2021 жылдың 31 желтоқсанына дейін ауылшаруашылық жерлерін қазақстандықтардың жеке меншігіне беруге және оларды шетелдіктерге жалға беру нормаларын қолдануға мораторий жарияланды. Бұл мораторий қоғамдағы шиеленісті белгілі бір деңгейде жоюға мүмкіндік берді, үкіметке қоғаммен бірге Жер кодексінің нормаларын егжей-тегжейлі әзірлеуге және дайындауға уақыт берілді. Мораторийдің аяқталуына бір жылдан аз уақыт қалғанын мойындауымыз керек, ал үкімет Жер кодексіндегі проблемалық мәселелерді шешу бойынша тиімді жұмыс жүргізбей жатыр, деп мәлімдеді ол.
Осы негізде ол Премьер-министрден Ауыл шаруашылығы министрлігіне осы салаға қоғамды міндетті түрде тарту және ұсынылған түзетулерді қоғамдық талқылау арқылы жұмысты жеделдетуді тапсыруды сұрады.
Мемлекет басшысының тапсырмаларын орындауда осы өзекті мәселені оңтайлы шешу үшін биылғы жылдың 1 шілдесіне дейін біз Жер туралы заңды тез арада қабылдауымыз керек, - деп сөзін қорытындылады Паяев.
