Сыртқы істер министрі Дүниежүзілік банк өкілімен кездесті
Баспасөз қызметі
Қазақстан Республикасы Премьер-министрінің орынбасары – Сыртқы істер министрі Мұхтар Тілеуберді Дүниежүзілік банктің Өңірлік директоры Лилия Бурунчукті және Қазақстандағы Тұрақты өкілі Жан-Франсуа Мартоны қабылдады, деп хабарлайды zakon.kz.
ҚР СІМ баспасөз қызметінің хабарлауынша, кездесу барысында Қазақстан мен Дүниежүзілік банк тобы арасындағы ынтымақтастықтың әлеуетті бағыттары талқыланып, сондай-ақ қазақстандық экономиканың басым секторларындағы жобаларды іске асыруға бағытталған «реформалар матрицасын» әзірлеуді аяқтау мәселелері қарастырылды.
Министр сұхбаттастарын коронавирус пандемиясының салдарын еңсеру жөніндегі Үкіметтің шараларымен таныстырды. Ол Дүниежүзілік банк басшылығына COVID-19-ға қарсы күресте көрсеткен қолдауы үшін алғыс айтты.
Кездесу қорытындысы бойынша тараптар барлық бағыттар бойынша сындарлы өзара іс-қимылды жалғастыруға келісті.
