Қырғызстанның экс-премьері үйқамаққа ауыстырылды

Бұрынғы үкімет басшысы шамамен 50 миллион сомды (шамамен 590 мың доллар) төлеу арқылы мемлекетке келтірілген залалды ішінара өтеген.

Қырғызстанның бұрынғы премьер-министрі Мұхаммедқали Әбілғазиев сот шешімімен үйқамаққа босатылды, деп хабарлайды zakon.kz.

Бұл туралы ТАСС-қа арнайы қызметтің өкілі хабарлады.

Әбілғазиевке қатысты сот оны үйқамаққа жіберу туралы шешім шығарды, - деді агенттіктің дерек көзі.

Оның айтуынша, бұрынғы үкімет басшысы шамамен 50 миллион сомды (шамамен 590 мың доллар) төлеу арқылы мемлекетке келтірілген залалды ішінара өтеген.

Айта кетелік, Әбілғазиев 2018-2020 жылдар аралығында Министрлер кабинетін басқарды.

2021 жылдың қаңтарында ол Centerra Gold шетелдік инвесторлары игеретін "Құмтөр" алтын кенішіндегі сыбайлас жемқорлыққа қатысты тергеу аясында ұсталды.