Тоқаев жалпыұлттық аза тұту күнін жариялады
Ақорда
Қазақстан Президенті Қасым-Жомарт Тоқаев 29 тамызды Жамбыл облысында оқ-дәрі қоймасы жарылысынан қаза тапқандарды аза тұту күні деп жариялады, деп хабарлайды zakon.kz.
Жамбыл облысы Байзақ ауданындағы адам өліміне әкеп соқтырған қайғылы оқиғаға байланысты 29 тамызды Жалпыұлттық аза тұту күні деп жариялаймын. Қаза болған әскери қызметшілер мен құтқарушылар ерен ерлік пен нағыз жанқиярлық көрсетті. Ерлеріміздің есімі ел жадында мәңгі сақталады, деп жазды Тоқаев Twitter-де.
26 тамызда Жамбыл облысы, Байзақ ауданында орналасқан әскери бөлімдегі қоймалардың бірінің жанында өрт шықты. Қорғаныс министрлігі онға жуық дүмпу болғанын хабарлады.
Төтенше жағдайлар министрлігінің 50-ге жуық қызметкері түрлі дене жарақаттарын алды.
Бүгінгі күні Жамбыл облысында болған жарылыстан 13 адам қаза тапқаны белгілі.
Қасым-Жомарт Тоқаев қаза болғандардың туыстарына көңіл айтты. Ол шұғыл жиын өткізіп, төтенше жағдайдың салдарын жою үшін ведомствоаралық комиссия құруды тапсырды. Сондай-ақ Президент жергілікті билікке ауыл тұрғындарын үйлеріне қайтаруға бағытталған шараларды қабылдауды, сондай-ақ болған оқиғаға қатысты объективті тергеу жүргізуді тапсырды.
