Саран қаласында шина зауыты салынуда
Қарағанды облысының әкімдігі
Қарағанды облысының Саран қаласында шина зауыты салынуда, деп хабарлайды zakon.kz.
Қарағанды облысы әкімдігінің мәліметінше, өндірістік цехтың бас корпусы салына бастады. Өнеркәсіптік алаңның дамуы индустриялық аймақ орналасқан РТИ шағын ауданына да оң әсерін тигізеді. Онда көп қабатты үйлер қалпына келтіріліп, модульдік қазандық салынуда және заманауи балабақша пайда болуы керек.
Шина зауытын іске қосу 2022 жылдың соңына жоспарланған. Кәсіпорында жылына шамамен 3,5 млн шина шығару көзделіп отыр. Олар Қазақстанда шығарылатын автомобильдерді жиынтықтауға, екінші нарыққа, сондай-ақ таяу шетелге экспортқа жіберілетін болады. Мыңнан астам жергілікті тұрғын зауытқа жұмысқа орналасады.
Қызметкерлерді оқыту үшін Ресейдің Нижнекамск қаласындағы шина зауытында тағылымдама ұйымдастырылды. Оқу кезінде жұмыс беруші болашақ мамандарға жалақы төлейді және жол жүру мен жатын орын шығындарын өз мойнына алады. Зауыт іске қосылғанға дейін шамамен 500 адам оқудан және қайта даярлаудан өтеді.
Айта кету керек, РТИ индустриялық алаңында автобус шығаратын зауыт жұмыс істеп жатыр. Тағы бір жаңа кәсіпорынды іске қосу моноқаланың дамуына үлкен серпін береді.
Шағын аудандағы өнеркәсіптік аймақты жандандырумен қатар, 90-шы жылдардағы қараусыз қалған үйлер жергілікті кәсіпорындар есебінен қалпына келтірілуде. Өткен жылы біз екі үйді жөндедік, оларға қазір тұрғындар қоныстанды. Пәтерлер кезекте тұрғандарға таратылды. Төрт үй өнеркәсіптік кәсіпорындардың қаражаты есебінен қалпына келтіріледі, олар оны өз қызметкерлеріне дайындайды. Биыл және келесі жылы 10 үйді жөндеуді жоспарлап отырмыз, - деді Саран қаласының құрылыс бөлімінің басшысы Құрмет Шайкенов.
Саран қаласында тұрғын үй кезегінде мыңға жуық адам тұр. РТИ шағын ауданындағы үйлерді қалпына келтіру кезекте тұрғандар санын айтарлықтай қысқартуға мүмкіндік береді.
Бастауыш сынып мұғалімі Алмагүл Күленбаева өз кезегін 10 жыл күтті. Ол қалпына келтірілген үйлердің бірінен пәтер алып, қоныс тойын тойлады.
Мен өте ризамын. Менің бір бөлмелі пәтерім бар, жылы, жарық. Шағын аудан өмірге келді, жақын жерде үйлер де қалпына келтірілуде. Автобустар әр жарты сағат сайын жүреді, аула – керемет, - дейді Алмагүл.
Сондай-ақ, шағын ауданда үш аула абаттандырылып, жолдар жөнделді, тротуарлар жабдықталды және жарық диодты шамдармен 77 жарықтандыру тіректері орнатылды. Бұдан басқа, елдімекенде модульдік қазандықтың құрылысы басталды, ол РТИ үйін орталықтандырылған жылумен қамтамасыз етеді.
Бұл жерде мектеп бар, келесі жылы жеке инвестициялар есебінен жаңа балабақша салу жоспарлануда, – деп атап өтті Құрмет Шайкенов.
Бақытжан Отарбаева
