Сенаторлар кірістерді жылыстатуға қарсы іс-қимыл туралы заң жобасын талқылады
Н.Байбулин
Сенатта Ольга Перепечинаның төрағалық етуімен Қаржы және бюджет комитетінің кеңейтілген отырысы өтті. Онда депутаттар "Қазақстан Республикасының кейбір заңнамалық актілеріне қылмыстық жолмен алынған кірістерді заңдастыруға (жылыстатуға) және терроризмді қаржыландыруға қарсы іс-қимыл мәселелері бойынша өзгерістер мен толықтырулар енгізу туралы" заң жобасын қарады, деп хабарлайды Zakon.kz.
Заң жобасы ұлттық және шетелдік мемлекеттік лауазымды тұлғаларға бөле отырып "жария лауазымды тұлғалар" деген жаңа ұғымды енгізуді де көздейді. Бұл ретте салалық агенттік қаржы мониторингін жүргізу үшін ұлттық жария лауазымды тұлғалардың тізімін енгізетін болады.
Сондай-ақ цифрлық активтер саласында қызмет атқаратын тұлғалар қаржы мониторингі субъектілерінің қатарына жатқызылатын болады. Олар өз қызметінің басталғаны туралы ақпараттандыру саласындағы уәкілетті органды хабардар етуге тиіс, ал бақылау-қадағалау функциялары еліміздің Цифрлық даму, инновациялар және аэроғарыш өнеркәсібі министрлігіне берілетін болады.
Осы және басқа да жаңалықтар кірістерді жылыстатуға қарсы іс-қимылдың ұлттық жүйесін жақсартуға бағытталып отыр.
Депутаттар комитеттің кеңейтілген отырысының қорытындысы бойынша заң жобасын Палатаның қарауына беру туралы шешім қабылдады.
