Мемлекет басшысына Қазақстандағы криминогендік жағдай туралы есеп берілді

Президент қабылдауы, Қасым-Жомарт Тоқаев, Ішкі істер министрі, сурет - Zakon.kz жаңалық 22.11.2023 18:04

Сурет: akorda.kz

2023 жылы 22 қарашада Мемлекет басшысы Қасым-Жомарт Тоқаев Ішкі істер министрі Ержан Сәденовті қабылдады, деп хабарлайды Zakon.kz.

Мемлекет басшысына Қазақстандағы криминогендік жағдай туралы баяндалды, делінген Ақорданың баспасөз қызметі таратқан хабарламада.

Ержан Сәденов өз баяндамасында мынандай басты мәселелерге тоқталды:

елімізде жасалатын қылмыстар санының төмендеу динамикасы сақталып отыр. Кісі өлтіру 20 пайызға, ұрлық 28 пайызға, қарақшылық 32 пайызға азайған;
тонау, бұзақылық, мал ұрлығы, денсаулыққа ауыр зиян келтіру фактілері, сондай-ақ басқа да қылмыс түрлері төмендеді;
құқықбұзушылыққа мүлде төзбеушілік қағидатын қалыптастыру, заңға қайшы әрекеттер мен қылмыс жасағаны үшін жазаның бұлтартпастығын іске асыру, жол қауіпсіздігін қамтамасыз ету жұмыстары туралы мәлімет берді: Бүгінде 8 миллион 500 мың заңға қайшы әрекет анықталған. Бұл өткен жылмен салыстырғанда 1 миллионға көп. Жасалған құқықбұзушылықтар үшін 90 миллиард теңге көлемінде әкімшілік айыппұл салынды, 71 миллиард теңге өндіріп алынды;
ішкі істер органдарының жұмысын жетілдіру, соның ішінде ІІО қызметкерлерін аттестациядан өткізіп, ведомствоны лайықсыз мамандардан тазарту шаралары туралы да баяндалды.

Кездесу соңында Қасым-Жомарт Тоқаев "Заң және Тәртіп" қағидатын қамтамасыз ету жөнінде бірқатар нақты тапсырма берді.

Мемлекет басшысы қоғамда әділдік пен тәртіп орнату үшін құқық қорғау органдарының қызметкерлеріне үлкен жауапкершілік жүктелгенін айтты.

Оқи отырыңыз