Қазақстан мен Өзбекстанның теміржол әкімшіліктері арасында бірлескен кәсіпорын құрылады

Келіссөз, Өзбекстан, Қазақстан, бірлескен кәсіпорын, теміржол саласы, сурет - Zakon.kz жаңалық 05.04.2024 18:33

Сурет: akorda.kz

Қасым-Жомарт Тоқаев пен Шавкат Мирзёев өңірдегі өзара ынтымақтастықты нығайту үшін Қазақстан мен Өзбекстанның теміржол әкімшіліктері арасында бірлескен кәсіпорын құру туралы бастамаға қолдау білдірді, деп хабарлайды Zakon.kz.

Бұл туралы 2024 жылы 5 сәуірде Хиуа қаласында өткен Қасым-Жомарт Тоқаев пен Өзбекстан Президенті Шавкат Мирзиёевтің бейресми кездесуі кезінде айтылды.

"Келіссөз барысында мемлекеттер басшылары Орталық Азиядағы тұрақтылық пен қауіпсіздікті сақтау мәселесіне ерекше назар аударды. Осы ретте Орталық Азия мемлекеттері басшыларының кезекті алтыншы Консультативтік кездесуіне дайындық барысы, сондай-ақ С5+ форматындағы ықпалдастық перспективалары талқыланды", делінген Ақорда хабарламасында.

Екі ел басшылары өңірдегі өзара ынтымақтастықты нығайту үшін Қазақстан мен Өзбекстанның теміржол әкімшіліктері арасында бірлескен кәсіпорын құру туралы бастамаға қолдау білдірді. Бұл бірлескен кәсіпорынды құрудағы мақсат – Қытай – Қазақстан – Өзбекстан бағытындағы жүк тасымалын ұйымдастыру үшін қазақ-қытай шекарасындағы және Өзбекстандағы жүк терминалдарын өзара тиімді негізде пайдалану.
Аталған жоба екіжақты сауданы жандандырып, тауар тасымалының көлемін арттыруға ықпал етеді, сондай-ақ оңтүстік бағыттағы жүк тасымалын ұлғайтуға қолайлы жағдай туғызады.
Бірлескен кәсіпорын Трансауған бағытын дамытуға жұмылдырылады.