Қазақстандық палуандар қазақша күрестен әлем чемпионатында тағы 7 алтын жеңіп алды

Қазақстан қазақ күресінен 7 алтын жеңіп алды, сурет - Zakon.kz жаңалық 15.12.2022 11:57

Сурет: Instagram/qazaqkuresi.kz

Астанада өткен қазақша күрестен әлем чемпионатының соңғы күнінде (U-17) мен (U-20) екі жас санатында жүлделер сарапқа салынды. Қазақстан күресшілері жеңіс тұғырының ең биік сатысына жеті рет көтерілді, деп хабарлайды Zakon.kz.

17 жасқа дейінгі ұлдар арасында әлем чемпионатының алтын медалін Ақылбек Аманұлы (50 келі), Әли Әлімби (60 келі) және Сардар Әбдісаметұлы (+82 келі) жеңіп алды.

Дәл осы жас санатында Олжас Жоспар (70 келі) күміс алды. Ал Қыдырмолда Қуан (50 келі), Рузимин Тұғышев (60 келі) және Дәрусейтхан Темірхан (82 келі) қола жүлдені иеленді.

Жастар арасында (U20) Руслан Теміржан (60 келі), Жұмажан Қожамбеков (74 келі), Бибарыс Нұғман (84 келі) және Ерасыл Амангелдінің (+100 келі) құрметіне Қазақстанның әнұраны шырқалды. Ал Шоқан Нұрмаханбетов (100 келі) күміс жүлдегер атанды. Алтынбек Қалмақбаев (60 келі), Ералхан Балтабай (72 келі), Мейіржан Беріков (100 келі) және Мейіржан Әбдімәліков (+100 келі) жеңіс тұғырының үшінші сатысына көтерілді.

Жалпыкомандалық есепте әйелдер мен ерлер командаларын қоса алғанда, 15 жоғары құнды жүлдемен қазақстандық палуандар бірінші орынды жеңіп алды.

Оқи отырыңыз