Шавкат Рахмонов спортты қолдау қорынан қаржыландырылады – министр

Ережесіз жекпе-жек шебері Шавкат Рахмоновпен Мәдениет және спорт министрі Асхат Оралов кездесті. Министр спортшы келесі жекпе-жектерге дайындалу үшін спортты қолдау қоры тарапынан қаржыландырылатынын жеткізді, деп хабарлайды Zakon.kz.

"Бүгін Қазақстан спортының жарқын жұлдыздарының бірі-Шавкат Рахмоновпен жеке кездестім. Біздің жаужүрек спортшымыз бірінен соң бір жеңіске жетіп, UFC-ді батыл қадамдарымен бағындырып, отандастарының жүрегіне мақтаныш сезімін сыйлап келеді. Мен Шавкатты жақында американдық Джефф Нилмен болған жекпе-жектегі жеңісімен тағы да құттықтадым және оған алғыс хат табыстадым. Сондай-ақ, ол келесі жекпе-жектерге дайындалу үшін спортты қолдау қорынан қаржыландырылады", деп жазды Асхат Оралов Facebook-тегі парақшасында.

Сондай-ақ Шавкатқа бүкіл әлемге Қазақстанды паш етіп, осы қадамы үшін айрықша алғысын жеткізген министр оның UFC чемпиондық белбеуін жеңіп алуына тілектестік білдірді.