Қазақстанның жас атқыштары 2023 жылғы әлем чемпионатында рекордпен алтын жеңіп алды
Сурет: Instagram/drs_kz
Пневматикалық мылтықтан 10 метр қашықтықтан қозғалып келе жатқан нысанаға оқ атуда Қазақстанның қыздар командасына тең келер ешкім болмады. Олар финалда Украина өкілдерін ұтты. Әлем чемпионы атағын ел намысын қорғаған апалы-сіңлілі Зухра мен Фатима Ирназаровалар, сонымен қатар Александра Сәдуақасова иеленді. Қазақстандық атқыштар триосы бұл жарыста ересектер арасында әлемдік рекорд орнатты (1686 ұпай).
Украиналық атқыштар триосы қазақ жігіттерін кезек-кезек ұтып, жасөспірімдер арасында үздік атанды. Біздің командада Асадбек Назирқұлев, Илья Зотеев және Даниил Яковенко болды.
Қазақстандық спортшы Фатима Ирназарова 2023 жылғы әлем чемпионатында жекелей сында алтынын күміспен толықтырып, пневматикалық мылтықтан қозғалатын нысанаға атудан екінші болды. Ол финалда украиналық Маргарита Тарканиден жеңіліп қалды - 6:4. Дегенмен, Фатиманың іріктеу турнирінде жинаған 572 ұпайы жасөспірімдер арасындағы әлемдік рекорд екенін айта кеткен жөн.
Тағы бір жерлесіміз Александра Сәдуақасова қола жүлде үшін белдесуде украиналық Алина Ткаликтен жеңіліп қалды. Ал Никита Чирюкин 25 метрден (572 ұпай) тапаншадан ату бойынша күміс медальді иеленді. Ол тек жарыс қожайыны Сук Джин Хунға (578 ұпай) есе жіберді.
Осылайша Қазақстанның жасөспірімдері 2023 жылы Оңтүстік Кореяда өтіп жатқан әлем чемпионатында осы сағатқа дейін 6 медаль жеңіп алды. Стартта Никита Чирюкин алтын алса, Арина Алтухова күміс жүлдемен ерекшеленді.
