Бублик сенсация жасады: алғаш рет Париждегі “Мастерс” турнирінің ширек финалына өтті

Қазақстанның бірінші ракеткасы Александр Бублик 30 қазанда Париждегі ATP 1000 турнирінің 1/8 финалдық матчтарында керемет нәтижеге қол жеткізді, деп хабарлайды Zakon.kz.

Қазақстанның үздік теннисшісі турнирдің ширек финалына жолдама алу үшін әлемнің төртінші ракеткасы, америкалық Тейлор Фрицті екі сетте жеңді – 7:6 (7:5), 6:2.

Ойын 1 сағат 27 минутқа созылды. Осы уақыт ішінде Бублик 11 эйс жасады, ал қарсыласы – 15.

Париж корттарында 13-нөмірмен сынға түсіп жатқан қазақстандық теннисші 31 қазанда Аустралия өкілі, турнирдің алтыншы ракеткасы Алекс де Минорға қарсы ойнайды.

Бұл кездесудің жеңімпазы ATP 1000 турнирінің жартылай финалына, сондай-ақ ірі сыйақы мен рейтингтік ұпайларға ие болады.