СҚО-да мас күйде көшеде жатқан әкім жұмыстан қуылды

Солтүстік Қазақстан облысында әдеп кеңесі қоғамдық орында мас күйде жүрген Тимирязев ауданының Целинный ауылдық округінің әкімі Ақан Қойшыбаевқа қатысты тәртіптік істі қарады, деп хабарлайды ҚазАқпарат тілшісі.

Қызметтік тексеріс материалдарына қарағанда, демалыста жүрген ауыл әкімін ішкі істер желілік бөлімінің қызметкерлері «Петропавл» стансасында ұстап, әкімшілік хаттама толтырған. Шенеунікке 5 АЕК мөлшерінде айыппұл салынды.

«Қойшыбаевтың айтуынша, ол бір бөтелке сыра ішіп, содан мазасызданған. Бірақ медициналық сараптама нәтижесінде оған «орташа ауыр алкогольдік мастық» диагнозы қойылды», - дейді мемлекеттік қызмет саласындағы бақылау басқармасының бас маманы Нұргүл Қахабаева.

Әкімшілік құқықбұзушылық туралы қаулы заңды күшіне енген.

Әдеп кеңесінің мүшелері Қойшыбаевтың әкімшілік жауапқа тартылғанына тексеріс жүргізді. Кеңес төрағасы, мемлекеттік қызмет істері және сыбайлас жемқорлыққа қарсы іс-қимыл департаментінің басшысы Ғалым Тұрсынбаев шенеуніктің бұл әрекетін Мемлекеттік қызмет туралы заңды бұзу деп бағалады.

«Оның неліктен полицияның назарына іліккенін айтайын. Медициналық сараптамаға қарағанда, ол көшеде өздігінен қимылдауға шамасы келмей жатқан. Көшеде жатқан кез келген шенеунік мемлекеттік қызмет атқармауы тиіс», - дейді Ғ. Тұрсынбаев.

Әдеп кеңесінің мүшелері Тимирязев ауданының әкіміне Қойшыбаевты лауазымынан босатуды ұсынды.