Күн суықта автобусқа кіре алмай жүрген балаларға қатысты видеоның мән-жайы белгілі болды

Әлеуметтік желіде автобусты айнала жүгіріп, ішіне кіре алмай жүрген оқушы балалардың видеосы тарады, деп хабарлайды NewTimes.kz.

Видеода мектеп автобусына кіре алмаған балалар оны шыр айналып жүгіріп, іште отырған шопырдан есікті ашуды сұрайды. Жүргізуші болса, бірдеңені шұқылап, балалардың өтінішін елемейді.

"Видеода біздің - Астана қаласындағы №69 мектеп-гимназиясының автобустары. Менің балаларым да күн суықта жүргізушілер автобусқа отырғызбай қоятынына талай шағымданған. Бұл дұрыс па? Мүмкін мектеп әкімшілігі бұл мәселеге назар аударатын шығар", - делінген видео сипаттамасында.

№ 69 мектептің әкімшілігі мұның бірер күн бұрын кешкі уақытта болғанын түсіндірді.

Мектеп завучы Жұлдыз Рахметова балалардың кесте бойынша сабақтан сыртқа ойнап келуге шыққанын айтады.

"Балалар мұғалімнің рұқсатымен сыртқа дем алуға шыққан. Ешкім оларды мектептен қуып шыққан жоқ. Біз қайтатын балаларды әрдайым ертіп шығып, бірінші қабаттан қадағалаймыз", - деді ол.

Завучтың айтуынша, бұл видео арандату үшін әдейі түсірілген.

"Видеоны түсіріп жатқан ер адам олардан айқайлауын сұрайды. Бұл видеоны түсірген адам оны мақсатты түрде жасады деп ойлаймын", - деді ол.

Осы жайттан соң ата-аналар балаларымен бірге мектепке жиналысқа шақырылған.

"Ата-аналар бұл оқиғаға қатысты шағымдары жоқ екенін ауызша айтып әрі жазбаша да қолхат қалдырды", - деді Жұлдыз Рахметова.

Сөз соңында ол автобус жүргізушісі жеке іспен шұғылданбағанын атап өтті.

"Олар маршруттарды талқылау үшін телефон арқылы жиналыс өткізді. Балалардың қауіпсіздігі үшін бәріміз алаңдаймыз", - деді ол.

Оқи отырыңыз

Сәл болмағанда жарылыс бола жаздады: Алматының шығыс айналма жолындағы өрт

13:48, 26 сәуір 2024

Ақтөбеде су тасқыны салдарынан екі көпір жүруге жарамсыз болып қалды

13:09, 26 сәуір 2024

Шымкентте жалған полицейлер ұсталды

09:09, 26 сәуір 2024