Төрт облыста жарықтың бірдей сөніп қалуының себебі белгілі болды

9 ақпанда астана уақытымен сағат 20:00 шамасында жылдамдығы секундына 30 метрден асатын қатты боранның салдарынан жоғары кернеулі 500 кВ (ВЛ-500 кВ) "Солтүстік-Оңтүстік" транзиттік желі істен шықты. Бұл туралы KEGOC компаниясындағылар мәлімдеді, деп хабарлайды zakon.kz.

Бұл өз кезегінде Қазақстанның Біртұтас энергетикалық жүйесінің (БЭЖ) оңтүстік аймағын және Орталық Азияның Біртұтас энергетикалық жүйесін БЭЖ-ден бөлініп, ажырауына әкеліп соқты. Салдарынан Алматы, Қызылорда, Жамбыл және Түркістан облыстарында жарық болмай қалды.

20: 57-де ажырап қалған Қазақстанның оңтүстік аймағы мен Орталық Азияның Біртұтас энергетикалық жүйесі БЭЖ-ға параллель жолмен қосылды.

21: 27-де бүкіл шектеудің көзі жойылып, электр тарату ісі қалпына келтірілді, қуат жүйесі қалыпты жұмысына кірісті.