Уақыт беріңіздер! Шошқа фермасының басшысы шырылдап отыр
видеодан кадр
Уақыт беріңіздер! Тұрғындары тынысымызды тарылтты деп шағым айтқан Ақтөбе облысының Бестамақ ауылындағы шошқа фермасының басшысы шешім қабылдауға әкімдіктегілерден уақыт сұрады, деп хабарлайды zakon.kz Еуразия бірінші арнасына сілтеме жасап.
Кешеннің жұмысын тексеру үшін құрылған комиссия бүгін жұмыстың қорытындысын жариялаған болатын. Ал облыстық әкімдік кәсіпкерге екі талап қойып еді: кәсіпорынды жабу не бағытын өзгерту. Алайда ол сол күйі өзгеріссіз қалған.
Нұржауған Қалауов, облыс әкімінің бірінші орынбасары:
Екеуінің біреуін қабылдау керек. Талап сол күйінде қалды. Заң бұзушылықтар бар. Соның ішінде ферманың жұмысында, сантиарлық, эпидемиологиялық, экологиялық талаптардың бұзылуында кемшіліктер анықталды. Олардың мөлшерлері белгіленді. Барлық материалдары прокуротураға берілді. Алға ауданы ішкі істер бөліміне әрі қозғау үшін жеткізілді.
Естеріңізге салсақ, осыдан он күн бұрын Бестамақ ауылының тұрғындары шу шығарған еді. Олар кәсіпорынның жұмысын шұғыл арада тоқтатуды талап етті. Өйткені, фермадағылар жануардың ішек-қарнын ауыл маңына төгіп, ауаны ластайды деп уәж айтқан болатын. Қазір кәсіпорын жұмыс істеп тұр. Ферма басшысы қандай шешім қабылдағанын бір апта ішінде айтуы тиіс.
